Miren Altuna neurologoarekin topaketa

Zer dakigu benetan Alzheimerraz?

ZarautzOn Hitzaldia – 2023 05 23

“Diagnostiko goiztiarra egin daiteke”

ZarautzOneko hitzaldi berri bat egin genuen, oraingoan Miren Altuna doktore zarauztarraren eskutik, neurologoa eta CITA-alzhéimer fundazioko ikertzailea

Berrehun lagun inguru bildu ginen Zarauzko Modelo Aretoan, Alzheimerraren gaixotasunaren inguruan Miren Altunaren hitzaldia entzuteko eta galderaren bat egiteko asmoz.

Diagnostikoan eta etorkizuneko tratamenduetan egindako aurrerapenei buruzko ikasketa saio bat izan zen, bertaratutako guztientzat modu errazean azaldua eta gaixotasunari aurre egitearen bilakaerari buruzko mezu itxaropentsuak agerraraziz.

Miren Altunak adierazitako argudioen gogo bizia eta, aldi berean, sakontasuna, oso modu zuzenean iritsi zitzaien bertaratutako gehienei, eta, bere azalpenaren ondoren, galdera ugari egin zizkioten Mireni.

Bertaratutako guztiei zorion-sentimendua eragin zien Zarauzko ikertzaile gazte bat ikerketa medikoaren arlo hain aurreratuan izatea.

Biztanleriaren zahartzeak erronka soziosanitario berriak dakartza; horien artean zahartzaroari loturiko osasun arazoen maiztasuna nabarmen areagotzea, narriadura kognitiboa eragiten duten gaixotasunak barne. Alzheimerren gaixotasuna da guztietan ezagunena, baina ez bakarra. Zahartzaro osasuntsuari loturiko aldaera kognitiboak eta gaixotasun baten abiapuntu izan litezkeen lehen sintomak ezberdintzea ezinbestekoa da, diagnosi goiztiar eta egoki bat egin
ahal izateko.

Hitzaldian zehar gure errendimendu kognitiboari loturiko zein sintomek kezkatu behar gaituzten eta zeinek aldiz ez azaldu ditu. Era berean, osasunarazo horien diagnostiko goiztiarrean, zehazki, Alzheimerren gaixotasunari dagokionez, egindako aurrerapenak helarazi ditu. Gaixotasun horiei aurre egiteko ikerketak duen garrantzia azpimarratu, eta gai horri buruz egiten ari diren ikerketa motak azaldu dira, bai nazioartean, bai gure eskualdean. Gainera, gaur egungo tratamendu-aukerak eta etorkizun laburrean eskuragarri izatea espero direnak aipatu ditugu. Zorionez, baditugu itxaropenerako arrazoiak zientzia aldetik hamarkada goibel luze askoren ostean.

Hizlaria

Miren Altuna CITA-Alzheimer fundazioko eurologoa eta doktoratu ondoko ikertzailea da:
Medikuntza eta Kirurgian lizentziatua Euskal Herriko Unibertsitatean (2013), neurologoa BAME bidez Nafarroako Unibertsitate Ospitalean (0000-2017), BAME osteko espezializazioa kognizioaren eta jokabidearen patologietan, Bartzelonako Santa Creu i Sant Pau Ospitaleko Alzheimer-Down eta Memoria Unitateetan (2018-22), eta Osasun Zientzietan doktoratua Nafarroako Unibertsitate Publikoan (2021).

Gipuzkoako Medikuen Elkargoak (2022) Doktoretza Tesi Onenaren Ignacio María Barriola saria eman zion Alzheimerren gaixotasunean biomarkatzaile epigenetikoak identifikatzea izenburutzat zuen bere tesiari. 2020 eta 2022 bitartean Carlos III. Institutuko Rio-Hortega ikerketa-kontratu lehiakorraren onuraduna. 2022ko martxotik, neurologo klinikoa eta ikertzaile independentea da Donostiako CITA-Alzheimer fundazioan, eta Down sindromea duten pertsonen baitan Alzheimerren gaixotasunari buruz abian dauden bi proiekturen ikertzaile nagusi da (horietako bat Gipuzkoako Foru Aldundiak finantzatzen du eta bestea EITB maratoiak).
Gaur egun, lan hori Osakidetzako neurologo asistentzialarenarekin bateratzen du

Gomendatutako liburuak

Saioari hasiera emateko, hitzaldiaren hizlariak gomendatutako liburuen zozketa egin zen.

Liburu horiek hiru izan ziren:

Carme Eliasen “Cuando ya no sea yo”, José Luis Molinuevoren “Vivir con el Alzheimer” eta Saul Martínez Hortaren “Cerebros rotos”

Esker ona

Hitzaldiaren amaieran esker oneko oroigarri bat eman zitzaion, Jose Antonio Legorburu zarauztar margolariaren lana

Solasaldia

Modelo Aretoan izan ondoren, ekitaldia jarraitu zen, hitzaldi-afari batekin. Bertan, ikerkuntzan aritzen diren pertsonen bizitzaren alderdi asko partekatu ahal izan ziren, batez ere gainditzeko bide gogor bati aurre egin behar dioten gazteenak.