Irizar e-mobility, Gorostidi eta Larraul

ZarautzOnek Adunako Irizar e-mobility enpresara bisita gidatua antolatu zuen 2019ko apirilaren 30erako, asteartean.

Irizar e-mobility

Irizar e-mobility Irizar Taldekoa da, bidaiarien garraioaren sektoreko liderra eta elektromugikortasunean, energian, elektronikan, konektibitatean eta makina birakarietan erreferentea. Hirietarako elektromugikortasun-irtenbide integral pertsonalizatuak eskaintzeko jaio zen: % 100 elektrikoak diren ibilgailuen fabrikazioa, eta energia kargatzeko, trakziorako eta biltegiratzeko behar diren azpiegitura-sistema nagusien fabrikazioa eta instalazioa. Guztiak Taldearen teknologia % 100ekin diseinatu eta fabrikatuak daude.

2018ko maiatzean inauguratutako ekoizpen-planta berrian 10,8 eta 12 metroko hiri-autobusak ekoizten dira (2014tik Europako hainbat hiritan zirkulatzen ari dira), baita autobus artikulatuak eta, laster, biartikulatuak ere, eta beste ibilgailu elektriko batzuk.

Interesgarria iruditu zitzaigun Irizar e-mobility-ren proposamena ezagutzera joatea, garraio eraginkorrak, garbiak eta eskuragarriak sustatzeko apustua egin baitu, ingurumena, pertsonen ongizatea eta osasuna zaintzeko eta hiri-ingurune hobeak sortzeko.

Egitaraua

• 13:45 – Irteera Frantziskotarren autobus-geltokitik (Donostiarako norabideko beste geltokietan ere jaso zitezkeen behar zutenak)
• 14:15 – Harrera: kafea eta pastak
• 14:30 – Irizar e-mobility-ren aurkezpena: ibilgailu % 100 elektrikoak, zero emisio; kargatzeko sistemak; Irizar Taldearen % 100eko teknologia; garraioaren etorkizuna
• Tertulia
• Fabrikaren bisita
• 17:00 – Bisita gidatuaren amaiera
• 17:30–19:00 – Askaria Larrauleko Ostatuan