Zarautzen Zientziaz Blai 2021

ZarautzOn Elkarteak 2021eko azaroaren 16an, asteartea, 19:00etan, Zarauzko Modelo Aretoan antolatu zuen Zarautzen Zientziaz Blai ekimenaren zazpigarren edizioa, 2014tik antolatzen ari garen formatuan.

Zarauzko lau gaztek beren ikerketa-proiektuak aurkeztu zituzten, natura, kirola, itsasoa eta klima-aldaketarekin zerikusia zutenak. Gonbidatu berezi gisa Xabier Uribe-Etxebarria izan genuen, Sherpa.ai-ren sortzailea eta CEOa: bizkaitarra, baina Zarautzekiko lotura handia duena. Hortaz, nolabait, bost zarauztar gazte izan ziren ekitaldian. Ekitaldia zuzenean jarraitu zitekeen streaming bidez.

Hizlariak

Lore Zumeta Olaskoaga. Matematikaria, BCAM ikerketa-zentroko Estatistika Aplikatua taldeko doktoregaia. Matematikan graduatua (UPV/EHU) eta Estatistika eta Ikerkuntza Operatiboko masterra (UPC-Bartzelonako Unibertsitatea). Bere proiektuaren izenburua «Estatistika, kirola eta lesionatzeko arriskua, zer zerikusi dute?» da, eta kirolean, bereziki kirol-lesioetan, estatistika nola aplikatzen den ezagutarazten du: alor honetan gero eta informazio gehiago jasotzen da, eta informazio horren tratamendu egokiak lesioa hobeto ulertzen lagun dezake.

Joshua García-Herranz. Itsas zoologoa eta dibulgatzaile zientifikoa. Biologian graduatua Leongo Unibertsitatean, itsas ornodunen zoologian lizentziatua Galeseko Bangor Unibertsitatean eta Itsas Kontserbaziorako masterra Oviedoko Unibertsitatean. Marine Life Project zientzia-dibulgaziorako plataforma sortu du, eta Decathlon Donostiako ingurumen- eta komunikazio-arduraduna da. Galesen garatu zuen proiektuak baleen ehizak Ipar Atlantikoko ekologian eraginik izan ote zuen ikertzen zuen; horrek jakinmin handia piztu zion Zarautzek eta Oriok historian zehar baleen arrantzarekin izan duten lotura estuari buruz. Bere hitzaldia 2017an Galesen hasitako ikerketan ikasi eta aurkitutakoari buruzkoa izan zen.

Fermín Álvarez Agüés. Geologoa (UPV/EHU), Ingurumeneko eta Itsas Baliabideetako masterra Bordele-UPV eta Southamptoneko unibertsitateetan. Dublingo Trinity Collegeko Geologia Sailean doktoregaia. «Common Era Atlantic Sea Level Change» ikerketa-beka A4 proiektuaren parte da, diziplina anitzeko proiektu bat, Trinity College Dublinek eta Maynooth Universityk zuzentzen eta Europar Batasunak finantzatzen duena; klima-aldaketaren, haren iraganaren, aldakortasunaren eta etorkizuneko agertokien funtsezko ulermenean aurrera egitea du helburu. Tesiak Atlantikoko iraganeko itsas-mailaren aldaketak ezagutu nahi ditu: azken mendeetan Atlantikoko kostaldean itsas-maila nola aldatu den eta zein prozesu fisikok eragin duten aztertuz, datozen urteetako igoera aurreikusteko testuingurua eskaintzen du.

Eneko Azkue Larrañaga. Ingurumen Hezkuntza eta Kontroleko teknikaria eta Zarauzko Arkamurka natur taldeko kidea. Txikitatik interesatu zaizkio natura eta txoriak, amarekin Inurritza inguruetatik ibiltzen zenetik. Egurrezko 50 kaxa prestatu ditu sorbeltzek habia egin dezaten, eta Oteitza Lizeoarekin batera habia «adimendun» bat jarriko du: sorbeltzen migrazioa eta txitatzea monitorizatuko dituen sistema bat; hori izan zen hark aurkeztu zuen proiektua.

Xabier Uribe-Etxebarria. Sherpa.ai-ren sortzailea eta CEOa. Berritzailea, serieko ekintzailea eta adimen artifizialaren erreferentea. Algortan jaio zen 1981ean; Deustuko Unibertsitatean Antolakuntza Industrialeko ingeniaritza gorena eta Industria Ingeniaritza Teknikoa (elektronika) ikasi zituen, eta, besteak beste, Berrikuntza eta Ekintzailetzan (MIT Sloan), Negoziazioan (Monterreyko TEC) eta Marketin Digitalean (Harvard Business School) espezializatu zen. 2009an Anboto Group sortu zuen, eta 2010ean MIT Technology Reviewen TR35 Spain zerrendan sartu zen. 2012an Sherpa.ai sortu zuen, adimen artifiziala pertsonen zerbitzura jartzeko. Datamation aldizkariak munduko adimen artifizialaren 10 enpresa garrantzitsuenen artean sailkatu zuen, IBM, Google, Microsoft eta Amazonekin batera, eta 2021ean haren pribatutasun-teknologiak CogX saria jaso zuen, pribatutasun-araudia betetzeari egindako ekarpen onenarengatik. Rafael Yuste neurobiologoarekin batera, adimen artifizialerako kode etiko bat garatu du. 2018tik Oxfordeko Unibertsitateko Saïd Business Schooleko irakasle (lector) da, eta Choiseul 100 zerrendan dago, 42 urtetik beherako etorkizuneko liderren artean (2018 eta 2019). Appleren sortzailekide Steve Wozniakek bideokonferentzia bidez parte hartu zuen Bilboko Sherpa Summit-en (2015).

Azaroaren 16a, asteartea, 19:00etan, Zarauzko Modelo Aretoan.