Hitzaldiak

Espai en Blanc: gaixotasuna eta botere terapeutikoa

Arreta mediku edo klinikoaz haratago, botere terapeutikoaz hitz egiteak gaixotasuna eta egonezina esparru politikoan kokatzen ditu.

Asteartean, 2015eko urriaren 20an, arratsaldeko 7:30ean, Zarauzko Antoniano Aretoan

Arreta mediku edo klinikoaz haratago, botere terapeutikoaz hitz egiteak gaixotasuna eta egonezina esparru politikoan kokatzen ditu. Terapiak ez dira bakarrik praktika leungarri batzuk, baizik eta gaur egun boterea guregan ezartzen den moduaz mintzo dira. Botere erabilera horrek ez du helburu bezala normaltasuna, baizik eta bere ahultasuna kudeatzen duen indibiduo autonomo baten ekoizpena, egonezinaren politizazioa galeraziz horrela. Baina zinez zer esan nahi du gaizki egotea? Zer gertatzen zaigu gaixotzen garenean? Testu filosofiko eta biografiko baten erdibidean, Hijos de la noche liburuan, Santiago López Petitek galdera hauetan sakontzen du, ondorioztatzeko, anomalia bezala, hau da, gaixotzen gaituen bizitza honekin bat ez gatozen heinean geure burua asumitzen badugu bakarrik, egin ahal dugula gure bizi-gogoaz desafio bat. Horrela aurki dezake egonezin kolektiboak erantzun politiko bat, guztiei irekia eta anonimoen aurpegian adierazten den minaren indarraz mugitua dena. Espai en Blanc eta El Pressentiment-en laguntzaz honen erantzunaren lehen lerroak gauzatzen ari dira behar bada, oraindik mihimotz, modu kolektibo batean bakarrik artikula daitezkeen erantzunak alegia.

Espai en Blanc

Espai en Blanc pertsona talde baten apustu kolektiboa da, gogoeta berriro erakargarri egitea helburu duena. Hau da, errealitatean zulo bat ireki, ez dena definitzen dakienagatik, baizik eta ez dakienagatik. Aktibismo eta akademia, diskurtso eta ekintza, ideia eta esperimentazioren artean irekitzen da zulo hau. Horrexegatik da aldi berean apustu filosofiko eta politikoa. 2015aren amaieran Espai en Blanc oraindik existitzen da. Badira 12 urte zuloak irekitzen errealitatean, arnasa hartu ahal izateko. Kontzeptuak, idatziak, topaketak, txostenak, filmeak, ikerketak, argitalpenak… hauek dira Espai en Blanc taldeak pentsatu eta esperimentatu dituen material batzuk.

Espai en Blanc 2003an Bartzelonan jaio zen apustu filosofiko-politiko kolektibo gisa, helburu argi batekin: «pentsamendua berriz ere zirraragarri egitea». Zer esan nahi du horrek? Funtsean, EBren asmoa ez dela ezagutza ekoiztea (terminoaren zentzu akademikoenean), baizik eta dakigun horrekin neurtzea bere burua. Horregatik, apustu hau aldi berean esperimentala eta erradikalki politikoa da.

EBren ibilbidea luzea da eta hainbat esku-hartze motaz osatuta dago: topaketak, hitzaldiak, idatziak, argitalpenak… Elementurik ikusgarriena eta nagusia, agian, izen bereko aldizkaria izan da: ESPAI EN BLANC – Bizitza iraultzeko materialak (Materiales para la subversión de la vida). Argitaratu dituzten liburukiei jarritako izenburuen artean daude, adibidez: «Bizitza eta politika», «Anonimotasunaren indarra», «Pentsamenduaren borroka» edota «Politikoaren impassea». «Gizarte terapeutikoa» da horietako bat.

Kolektiboak argitaratzen dituen liburukien asmoa ez da gure bizitza pentsatzeko materialak zabaltzea baino, bizitza hori eraldatzeko helburuarekin, aldizkariaren azpitituluak dioen bezala (zentzu horretan, pentsamendu gorpuztua eta kokatua da), bai eta inguratzen gaituen errealitatea pentsatzea ere, hari zuloak egiteko helburuarekin. Bide bikoitz hori bizitzaren eta pentsamenduaren politizazioa besterik ez da (horizonte emantzipatzailerik gabeko testuinguru postmoderno honetan, non langile klasea desartikulatua izan den eta pentsamendu kritikoa oinarririk gabe geratu den).

Podcast
YouTube

Bisita gidatuak

Bisita gidatuak

Hitzaldiak

Hitzaldiak

Notiziak

Notiziak

Solasaldiak Koronavirus garaian

Solasaldiak Koronavirus garaian

Tailerrak

Tailerrak

Zineforum

Zineforum